《男女之間的純友誼》
男女有冇純友誼？當我老婆問我時，我即刻答，有！梗係有！我同你咪純友誼囉！
單身男女、熱戀情侶同其他人會唔會有純友誼我唔知，但只要你結咗婚，嗰種友誼你就會慢慢感覺到。
從十幾歲開始對異性有感覺，會有幻想會有興奮會有慾望，到成年之後，你開始習以為常，然後到結婚之後，我可以見到老婆沖完涼行出嚟都可以好集中係遊戲之中，仲會好親切咁同佢講，著返件衫唔好凍親啊！
曾經兩個人拍拖要搵間好好睇睇嘅餐廳食返餐形式大於食飯嘅晚餐，依家兩個人求其食，食乜有乜所謂；
曾經兩個人周末放假要定好晒去邊做乜，依家係屋企起身，想出去就出去，唔出去就係屋企做小廢物；
曾經兩個人會為打機煲劇唔理對方而爭執，覺得對方係唔係唔愛自己，依家兩個人一齊煲劇打機，仲Friend過打Band；
曾經佢會為你盛裝打扮，就算開cam傾計都會好注重形象，依家開cam佢仲會特登用個樣衰特效，愈嘔心大家就愈開心！
當結婚之後，一切都變晒喇，行出街，氣場就好似一對好兄弟一齊咁，少咗甜蜜，多咗輕鬆。
呢份友誼，唔係我個人問題，有時我聽到我阿媽係度鬧老豆放屁，老豆仲笑到不知幾高興，話食咗番薯嘛，你煮嘅，味道如何時，我終於明白，兩個人相處耐咗，呢份友誼再熟嘅兄弟你都唔敢做。
婚後年紀，當你睇返愛情小說，講單戀、苦戀、熱戀等等時，你會覺得原來自己曾經都咁為呢樣個樣而唔開心，為咗另一半做咗幾多樣形式主義嘅事，你怕咗呢種朝不保夕嘅關係。
再望望身邊老婆，每日生活橋段寫出嚟絕不驚艷，而畫風亦由愛情片，變成笑片，有時仲會係恐怖片，但生活，或者就係需要呢種平凡的幸福，呢種只有當時人先知道嘅純友誼。
如果你婚後覺得講「我愛你」太過隆重，可以試下講「友誼永固」，「朋友一生一起走」之類。
【以上建議，效果等都會由顏值、往績、心情、天氣、經期等等因素而不同，涉及風險，本人不對任何衍生結果而負責，利申，篇文係講完跪住Keyboard用膝蓋同血肉打出嚟！】
－－－－－－－－－－－－－－－－－－－－－
PS. 再次呼籲，買左書而未收到既朋友，pm我
PS2. 本來諗住書展賣書，所以印左成千本《弊傢伙，女朋友有咗》但仲有好多存貨係度未賣到，希望欣賞我故事既讀者可以支持一下
《弊傢伙，我女朋友有咗》經已上架，有興趣的朋友歡迎點擊下列連結購買。
預購 BY Payme, FPS, Alipay連結：https://forms.gle/UEdH32PfVD2cp5nK6
預購By 掌鋪，可以使用Visa Master Card連結：https://maydreaming.boutir.com/i/WDnmnPAAA
舊作《那天，我出席了一個葬禮》《同學會重遇的那個人》《南極》亦可以同時購買，有興趣的可留言式inbox查詢
Search